УИХ-ын намрын ээлжит чуулган нээлтээ хийлээ. Чуулганы нээлтэд Ерөнхийлөгч У.Хүрэлсүх, Ерөнхий сайд Л.Оюун-Эрдэнэ болон дипломат төлөөлөгчийн газар, олон улсын байгууллагын төлөөллүүд оролцсон байна.
 
УИХ-ын дарга Г.Занданшатар чуулганыг нээж үг хэлсэн бөгөөд ЖДҮ эрхлэгчдийг дэмжих “Итгэлийн зээл”-ийн талаар ярилаа. Тодруулбал, “Үйлдвэрлэж бүтээхийн төлөө зүтгэж, бодит үр дүнд хүрч байгаа сайхан жишээ цөөнгүй байна. Татвар, зээл, хөрөнгө оруулалтын бодлогоор дэмжээд эх оронч худалдан авалтыг төрийн байгууллагууд үлгэр жишээ болгон хэрэгжүүлбэл бид сайхан амьдралыг бүтээнэ гэж ЖДҮ эрхлэгчид хэлсэн. Жижиг дунд үйлдвэрлэлийг дэмжих нь улсынхаа хөгжлийг, иргэдийнхээ
амьжиргааг тэтгэж байна гэсэн үг.


Орлого багатай буюу  тогтмол бус орлоготой аж ахуй эрхлэх, амьжиргаагаа өөд татах эрмэлзэлтэй боловч барьцаа хөрөнгөгүйн улмаас зээл авч чаддаггүй иргэд олон байна. Ийм хүмүүс болон аж ахуй нэгжүүдэд зориулсан “Итгэлийн зээл”-ийг хуульчилж төрийн санхүүжилтээр зайлшгүй дэмжих шаардлагатай. Тиймээс хөдөө аж ахуйн үйлдвэрлэл, хүнсний ногоо, мод тариалах гэх мэт өрхийн бизнесийг эхний ээлжид итгэлийн зээлд хамруулахаар Монголбанктай хамтран Эдийн засгийн байнгын хороо мөнгө зээлийн бодлогын төсөл боловсруулж байна” гэлээ.