Өнөөдөр (2022.06.28) Баялаг бүтээгчдийг дэмжих холбооны Хоёрдугаар Их хурал боллоо. Тус хуралд Баялаг бүтээгчдийг дэмжих холбооны нийслэлийн 9 дүүрэг, 21 аймаг дахь салбарын 300 гаруй төлөөлөл ирж оролцлоо.

Орон даяар 100 мянга гаруй гишүүн, дэмжигчтэй Баялаг бүтээгчдийг дэмжих холбооны Хоёрдугаар Их хурлаар өнгөрсөн долоон жилийн үйл ажиллагааны тайлан болон цаашид хийж хэрэгжүүлэх ажлын төлөвлөгөөг танилцууллаа.

Мөн холбооны тэргүүн болон удирдах зөвлөлийн гишүүд нийт салбар хорооны төлөөлөгчдийн саналаар дахин улиран сонгогдлоо. Баялаг бүтээгчдийг дэмжих холбоо нь  2015 онд 1000 гаруй гишүүн, дэмжигчтэйгээр анхны Их хурлаа зохион байгуулж тэргүүнээ сонгож байсан. Байгуулагдсан цагаасаа өнөөг хүртэл идэвхтэй үйл ажиллагаа явуулж үндэсний үйлдвэрлэгч, баялаг бүтээгчдийн дуу хоолойг төр, засгийн шийдвэр гаргах түвшинд хүргэж ирснийг холбооны гишүүд Хоёрдугаар Их хурлын үеэр онцолж байлаа.





















Холбооны Их хуралд 21 аймгийн салбар хорооны төлөөлөл 300 гаруй төлөөлөл ирж оролцсоноос 1500 км-н холоос Увс аймгийн салбар хорооны төлөөлөл нийслэлд ирж оролцсон нь холбооны гишүүн дэмжигчдийн идэвх оролцоог илтгэсэн тод жишээ боллоо. Дэлхий нийтээр цахим шилжилт хийж байгаа энэ цаг үед Баялаг бүтээгчдийг дэмжих холбоо нь Монголын анхны цахим төрийн бус байгууллага болох зорилттойгоор орон даяар хаанаас ч гишүүнээр элсэх боломжтой цахим платформыг хөгжүүлэх ажлыг төлөвлөөд байгаа юм. Ингэснээр баялаг бүтээгч, үндэсний үйлдвэрлэл, үйлчилгээ эрхлэгчдийн эрх ашгийг хамгаалдаг монголын хамгийн том төрийн бус байгууллага болох Баялаг бүтээгчдийг дэмжих холбооны үйл ажиллагаа нээлттэй ил тод болох эхний алхам тавигдаж байгаа юм. Мөн цаашид дотоодын үйлдвэрлэлийг хөгжүүлэх, экспортлогч улс орон болоход баялаг бүтээгч, үйлдвэрлэгчдийнхээ эрх ашгийг хамгаалах, хамтран ажиллах гүүр болох чиглэлд нийт гишүүн дэмжигчдийг идэвхжүүлсэн, өргөн цар хүрээг хамарсан үйл ажиллагааг зохион байгуулахаар холбооны салбарын төлөөллүүд санал нэгдлээ. Баялаг бүтээгчдийг дэмжих холбооны Хоёрдугаар Их хурлаар холбооны анхны гишүүд, салбар хорооны төлөөллүүдэд баялаг бүтээгч шагналыг гардуулсан юм.