“Баялаг бүтээгчдийг дэмжинэ” төсөл нийслэл хотын баялаг бүтээгчдийг танилцуулж байгаа билээ. Энэ удаа бид Сонгинохайрхан дүүргийн баялаг бүтээгч “Үлэмж чанар” сургалтын төвийг онцолж байна.
3000 гаруй хүн мэргэжлийн ур чадвартай, ажилтай орлоготой болоод гарсан
Тус төвийг Монгол Улсын гавьяат багш, ноос ноолуурын зөвлөх инженер Т.Дунжаа гуай 1992 онд анх үүсгэн байгуулж, 2007 онд оноос сургалтын төвийнхөө үйл ажиллагааг албан ёсоор эхлүүлж өдгөөг хүртэл олон зуун хүнийг гар урлалын салбарт бэлтгэн, ажилтай амьдралтай болгожээ. Үйл ажиллагаагаа эхлүүлсэн цагаасаа хойш 4000 гаруй шавь бэлтгэсэн бөгөөд тэдний 80 гаруй хувь нь өрхийн болон жижиг дунд үйлдвэрлэлд, 20 хувь нь бүлэг хоршоо байгуулан ажиллаж байгаа аж.
Түүнтэй ярилцсанаа хүргэе.
-Сайн байна уу. Танай сургалтын төв хэдэн төрлийн сургалт явуулдаг вэ?
-Сайн байна уу. Манай сургалтын төв эсгий урлал, арьсан урлал, шүр сувдан урлал, гар хивс нэхмэл, оёдол эсгүүр гэсэн таван мэргэжлээр сургалтаа явуулж байна.
-Сургалтын төвд нь хичнээн залуучууд хамрагдсан бэ. Хэдэн багш багшилж байгаа вэ?
-Өнгөрсөн хугацаанд манай сургалтын төвөөс 3000 гаруй хүн мэргэжлийн ур чадвартай, ажилтай орлоготой болоод гарсан. Сургалтын төв хоёр ээлжээр 10 багштай үйл ажиллагаагаа явуулдаг.
-Сургалтын төв төгссөн хүмүүст сертификат олгодог уу?
-Тэгэлгүй яахав. Хөдөлмөрийн яамнаас баталгаажсан чадамжийн гэрчилгээ олгодог. Төгсөгчид маань бүгд л ямар нэг ажлын байртай үр, бүтээлтэй ажилладаг.
Найман аймагт очиж сургалт зохион байгуулсан
-Багш нараа хэрхэн шалгаруулж авдаг бэ?
-Тухайн мэргэжлээрээ мэргэшсэн, багшлах эрхийн үнэмлэхтэй, гурваас доошгүй жил багшилсан байхыг шаарддаг. Яагаад гэхээр насанд хүрэгчдийн сургалтанд маш өндөр шаардлага тавигддаг, богино хугацаанд явагддаг болохоор багш нараас маш их ур чадвар, эв дүй шаарддаг л даа.
Түүнчлэн зөвхөн нийслэлд ч биш бүх аймгуудад очиж сургалт явуулах анхны эрхийг манай төв авсан. Энэ утгаараа найман аймагт очиж сургалт зохион байгуулсан.
-Захиалга хэр байдаг вэ?
-Ихэвчлэн гадаад хүмүүс захиалга өгдөг. Бас гадаад руу явах гэж байгаа, гадаадаас ирсэн хүмүүс авдаг. Би хувьдаа зөвхөн захиалгын түвшинд байгаа энэ үйл ажиллагааг өргөтгөж импортыг орлож, экспортод гаргах бүтээгдэхүүн хийх зорилготой.
