"Баялаг бүтээгчдийг дэмжих" холбооны гишүүд өдрөөс өдөрт нэмэгдсээр байна. Уламжлалт, орчин үеийн технологи ашиглан үл давтагдах донж маягийн үндэсний бүтээлээр салбартаа тэргүүлэхээр зорьж буй Нүүдэлчний Соёл ХХК-ийн хамт олон "Баялаг бүтээгчдийг дэмжих холбоо"-нд элслээ. 

Монголын түүхийн ямар ч цаг үед усталгүй, хөгжсөөр ур хийц бүр нь ахин давтагдашгүйгээр өвлөгдөж ирсэн хосгүй нандин өвүүдийн нэг бол уран дархны урлал. Хуучин цагт Дарьганга, Далай Чойнхор вангийн, Батноров, Ноён сэрвээ зэрэг хийцээрээ ялгарч “брэнд” болсон ур хийцүүдийг өнөө цагийн дархчууд ижил түвшинд хийдэг болж цаашид улам хөгжүүлэх,технологийн дэвшил ашиглан сайжруулах, илүү гоёмсог болгох эрэл хайгуул хийсээр байгаа аж. Нүүдэлчний Соёл ХХК нь уран утсан сүлжмэл, хөөмөлийн аргаар бүтээлээ урладаг бөгөөд онцгой нарийн хийцтэй мөнгөн аяга, хэт хутганаас орчин үеийн хэв маягтай гоёл чимэглэл, үнэт эдлэл зэргийг захиалагчийн хүссэн загвараар урлаж байна.

Өв тээсэн, ур ухаан шингэсэн үндэсний бүтээлийг тасралтгүй хөгжүүлж, өвөг дээдсээс уламжлан ирсэн Монгол өв соёлоо түгээн дэлгэрүүлэх зорилготой "Нүүдэлчний Соёл" ХХК-ийн үүсгэн байгуулагч Т.Даваажаргал болон түүний хань, уран дархан Г.Мягмарсүрэн, тэдний хамт олонд өндрөөс өндөр амжилт хүсье.