Баянзүрх дүүргийн баялаг бүтээгчдийн бизнес форум үргэлжилж байна. Тус зөвлөгөөнд УИХ-ын гишүүн Д.Ганхуяг, Д.Арвин, Ж.Батзандан болон Баялаг бүтээгчдийг дэмжих холбооны Ерөнхийлөгч Ч.Даваабаяр, Аж үйлдвэрийн яам болон Зээлийн батлан даалтын сангийн холбогдох албаны хүмүүс оролцож байна. Түүнчлэн тус дүүргийн жижиг дунд үйлдвэрлэл эрхлэгчид санал бодлоо хуваалцаж, сонирхсон асуултдаа хариулт авч буй. Энэ үеэр зөвлөгөөнд оролцож байгаа Баянзүрх дүүргийн баялаг бүтээгчдийн сэтгэгдлийг сонслоо.
Баялаг бүтээгчдийг дэмжих холбооны Удирдах зөвлөлийн гишүүн “Бүрэн цутгамал” ХХК-ийн захирал Б.Батдэлгэр: Харилцан туршлага солилцсон үр дүнтэй зөвлөгөөн болж байна
Баянзүрх дүүргийн баялаг бүтээгчдийн чуулга уулзалт өнөөдөр амжилттай болж байна. Чуулга уулзалтад баялаг бүтээгчид маш идэвхтэй оролцлоо. Энэ нь баялаг бүтээгчдийн дуу хоолойг төр засагт хүргэх гүүр болж байгаагаараа онцлогтой. Өөрөөр хэлбэл энэ удаагийн чуулган уулзалт эрч хүчтэй зохион байгуулалт дунд үргэлжилж байна. Мэдээж хувь хүн аж ахуй нэгжүүд өөрсдийн бор зүрхээр ажилладаг. Гэсэн ч цаашид нэгдсэн зохион байгуулалтад орох шаардлагатай. Тиймээс өнөөдрийн бизнес форумын үеэр баялаг бүтээгчид хоорондоо танилцаж, харилцан туршлага солилцсон үр дүнтэй зөвлөгөөн болж байна.
“Хэв хашмал”компанийн менежер:Б.Бат-эрдэнэ: Баялаг бүтээгчдийг дэмжиж байгаад баяртай байна
Манай компани “Баялаг бүтээгчдийг дэмжинэ” төсөлд хамрагдаж бараа бүтээгдэхүүнээ олон нийтэд сурталчилсан. Бид импортыг орлох бүтээгдэхүүн үйлдвэрлэж зах зээлд нийлүүлж тодорхой тооны хүмүүсийг ажлын байраар хангаж,татвар төлдөг. Энэ дашрамд баялаг бүтээгчдийг дэмжиж байгаа “Масс агентлаг”-ийн хамт олонд талархал илэрхийлье.
Баянзүрх дүүргийн 27 дугаар хорооны өрхийн үйлдвэрлэгч н.Батсүрэн: Дуу хоолойгоо төр засагт хүргэхээр зөвлөлдлөө
Би өрхийн үйлдвэрлэл эрхлээд зургаан жил болж байна. Манай гэр бүлийн хүмүүс уран гартай дархан хүмүүс байдаг. Улмаар Батноровын эмээл,хазаар,ташуур аяга гэх мэт мөнгөөр хийж болох бүх л эд зүйлийг хийдэг. Мөн 2010 оноос эхлэн хоёр дахь ч түүхий эд болох ноосоор бэлэг дурсгалын зүйл үйлдвэрлэж байна. Баянзүрх дүүргийн баялаг бүтээгчид өнөөдөр чуулж дуу хоолойгоо төр засагт хүргэхээр зөвлөлдлөө. Энэ дашрамд Масс агентлагийн санаачлан хэрэгжүүлж байгаа баялаг бүтээгчдийг дэмжинэ төсөл нүдээ олсон ажил гэдгийг хэлье.
