“Баялаг бүтээгчдийг дэмжих холбоо” нь улс орны нийгэм эдийн засгийн хөгжилд баялаг бүтээгчдийн оруулж буй хувь нэмрийг төр захиргааны байгууллагуудаар дамжуулан хүргэхийн зэрэгцээ, баялаг бүтээгчдийн өмнө тулгамдаж буй асуудлууд, тэдгээрийг шийдвэрлэх гарц, шийдэл боломжуудыг эрэлхийлж, төр засгаас дэмжих санал зөвлөмжүүдийг бэлтгэн бодлого боловсруулагчид, шийдвэр гаргагчдад хүргүүлэх зорилгоор үндэсний хэмжээнд үйл ажиллагаагаа  явуулж байна.

“Баялаг бүтээгчдийг дэмжих холбоо”-ны удирдах зөвлөлийн ээлжит хуралдаан боллоо. Өнөөдрийн хуралдаанаар 2024 оны санхүүгийн болон үйл ажиллагааны тайланг танилцуулж, 2025  оны эхний хагас жилийн гүйцэтгэлээ хэлэлцлээ. Мөн 2025 оны ажлын төлөвлөгөөг хэлэлцэн батлав.

Ээлжит хуралдаанаар “Баялаг бүтээгчдийг дэмжих холбоо”-ны гүйцэтгэх захирлыг шинээр томиллоо. Удирдах зөвлөлийн гишүүдийн 100 хувийн саналаар “Баялаг бүтээгчдийг дэмжих холбоо”-ны гүйцэтгэх захирлаар Б.Батцэцэг томилогдов. Шинээр томилогдсон гүйцэтгэх захирал  “Баялаг бүтээгчдийг дэмжих холбоо”-ны 2025 оны төлөвлөгөө болон цаашид хийх ажлаа танилцуулан, хэлэлцлээ.

Энэ онд "Баялаг бүтээгчдийг дэмжих холбоо" үүсэн байгуулагдсаны 10 жилийн ой тохиож байна. Ойн хүрээнд тус холбооноос хэд хэдэн томоохон ажил хийхээр төлөвлөсөн бөгөөд төлөвлөгөөт ажлын хүрээнд таван ажлын хэсэг байгуулагдаж, ажилдаа орлоо.