“БАЯЛАГ БҮТЭЭГЧДИЙГ ДЭМЖИХ ХОЛБОО” НЬ 2024 ОНЫ УДИРДАХ ЗӨВЛӨЛИЙН IV ХУРЛАА ХИЙЛЭЭ

“Баялаг бүтээгчдийг дэмжих холбоо” нь улс орны нийгэм эдийн засгийн хөгжилд баялаг бүтээгчдийн оруулж буй хувь нэмрийг төр захиргааны байгууллагуудаар дамжуулан хүргэхийн зэрэгцээ, баялаг бүтээгчдийн өмнө тулгамдаж буй асуудлууд, тэдгээрийг шийдвэрлэх гарц, шийдэл боломжуудыг эрэлхийлж, төр засгаас дэмжих санал зөвлөмжүүдийг бэлтгэн бодлого боловсруулагчид, шийдвэр гаргагчдад хүргүүлэх зорилгоор үндэсний хэмжээнд үйл ажиллагаагаа  явуулж байна.


Монгол орны өнцөг булан бүрт буй баялаг бүтээгчдийг эгнээндээ нэгтгэн, дуу хоолой нь болж буй тус холбоо нь 21 аймаг, 330 сум, нийслэлийн 9 дүүрэгт салбар нэгжтэй, 100.000 гаруй гишүүнтэйгээр үйл ажиллагаагаа явуулдаг.

“Баялаг бүтээгчдийг дэмжих холбоо” нь 2024 оны дөрөвдөх удаагийн удирдах зөвлөлийн хурлаа хийлээ. Хурлаар оны эхний хагас жилийн гүйцэтгэлээ хэлэлцэж, холбооны нээлттэй зарчмаар удирдах зөвлөлийн гишүүд дундаас ээлжит гүйцэтгэх захирлаа шалгаруулан томиллоо. Гүйцэтгэх захирлын албан тушаалд гурван гишүүн нэрээ дэвшүүлснээс, тус холбооны удирдах зөвлөлийн гишүүн Н.Дулам шалгарч, гишүүдийн саналаар томилогдлоо. Тэрээр Алиман сар ХХК-ны үүсгэн байгуулагч, Санхүүгийн ментор, Бизенесийн зөвлөхөөр ажилладаг. Шинээр томилогдсон Гүйцэтгэх захирал цаашид “Баялаг бүтээгчдийг дэмжих холбоо”-ны хагас жилийн төлөвлөгөө болон цаашид хийх ажлаа танилцуулан, хэлэлцлээ.


Мөн үеэр “Баялаг бүтээгчдийг дэмжих холбоо”-ны Удирдах зөвлөлийн гишүүнээр “Тод оймс” ХХК-ны Захирал Б.Баяржаргал,” Монголын үйлдвэрлэгчдийг дэмжих холбоо”-ны Захирал Г. Даваадорж нарыг элсэн ажиллахыг Удирдах зөвлөлийн 100 хувийн саналаар дэмжин элсүүлсэн.


Дашрамд мэдээлэхэд “Баялаг бүтээгчдийн дэмжих холбоо”-ны 10 жилийн ой 2025 онд тохиох бөгөөд ойн хүрээнд зохиогдох үйл ажиллагаануудад идэвхтэй оролцох урилгыг нийт гишүүддээ хүргүүлж байна.