НҮБ-ын Аж үйлдвэрийн байгууллага (ЮНИДО)-ын Монгол Улсыг хариуцсан төлөөлөгч бөгөөд Бүс нутгийн газрын дарга Стивен Каргбо Гадаад харилцааны сайд Б.Батцэцэгт энэ сарын 22-ны өдөр итгэмжлэх захидлаа гардууллаа. Энэ хүрээнд Ерөнхийлөгчийн Гадаад бодлогын зөвлөх Э.Одбаяр, Үйлдвэр, үйлчилгээний бодлогын зөвлөх Ч.Даваабаяр нар ноён Стивен Каргбог хүлээн авч уулзан, Монгол Улсын Ерөнхийлөгчийн санаачилсан "Тэрбум мод", "Хүнсний хувьсгал", "Эрүүл Монгол хүн" үндэсний хөдөлгөөнүүдийн хүрээнд НҮБ-ын Аж үйлдвэрийн хөгжлийн байгууллага ЮНИДО-ын хамтын ажиллагааны талаар санал солилцлоо.
НҮБ-ын Аж үйлдвэрийн хөгжлийн байгууллага (UNIDO) нь улс орнуудын Хүнс, хөдөө аж ахуй, хөнгөн үйлдвэр, эрчим хүч болон байгаль орчны салбарыг түлхүү хөгжүүлэх зорилготойгоор үйл ажиллагаа явуулдаг. Одоогийн байдлаар Хүнс, хөдөө аж ахуй, хөнгөн үйлдвэрийн яам (ХХААХҮЯ) -аас хэрэгжүүлж буй Дэлхийн банкны санхүүжилттэй "Экспортыг дэмжих" төслийн хүрээнд Монгол Улсад итгэмжлэл, тохирлын үнэлгээний чадавхыг сайжруулах, улмаар хүнс болон хөнгөн үйлдвэрлэлийн аж ахуйн нэгжүүдийн өрсөлдөх чадавхыг нэмэгдүүлэхэд техникийн туслалцаа үзүүлэн ажиллаж байна.
