“Баялаг бүтээгчдийг дэмжих холбоо” Монголын үйлдвэрчний эвлэлийн холбоотой хамтран ажиллах санамж бичигт гарын үсэг зурлаа. Ингэснээр ажил олгогч, ажилтан хоёр нэгдмэл болж, улс орны эдийн засаг амархан сэргэх боломж бүрдэж байна.

 

 Удаан хугацаанд ажил олгогч ажилтан хоёрыг дайснууд мэт ойлгож ирсэн. Гэвч энэ хоёр субъект нэгдмэл, нэг зорилготой байж улс орны хөгжил хурдасдаг. Үүнийг АНУ, Герман, Швейцар гэх мэт олон улсын жишээнээс харж болно. Тэр тусмаа АНУ-ын эрх баригч нам солигдсон ч ажил олгогч, ажилтантай холбогдсон харилцааг бодлогын хүрээнд үргэлжлүүлэн хэрэгжүүлж байна. Энэ жишгийг эх орондоо хэрэгжүүлэх зорилгоор “Баялаг бүтээгчдийг дэмжих холбоо” МҮЭХ-той хамтран ажиллах санамж бичигт гарын үсэг зурлаа.

 
 Аливаа ажил олгогч, бизнес эрхлэгч, баялаг бүтээгчдийн хамгийн үнэ цэнэтэй капитал бол хүний нөөц юм. Гэвч Монгол Улсад ажилтнуудын хөдөлмөрийг дутуу үнэлснээс бүхий л хийж бүтээх насны, чадварлаг залуусаа гаднын улсад алдаж байгааг МҮЭХ-ны Ерөнхийлөгч С.Эрдэнэбат онцоллоо. Ажил олгогчдын бизнесийн нөхцөлийг сайжруулж байж дээрх асуудал шийдэгдэх юм.
 
Энэхүү хоёр байгууллага хамтран ажилласнаар цаашид төр засгийн шийдвэрт баялаг бүтээгчид, үйлдвэрчдийн эрх ашгийг тусгах ажил илүү эрчимжинэ. Мөн ажлын байрыг нэмэгдүүлэх, улс орны эдийн засаг сайжрах, хөдөлмөрийн үнэлэмжийг нэмэх нь хоёр байгууллагын гол зорилго юм.