Монголчуудын эртний ундаа хөхүүрийн айраг ЮНЕСКО-гийн хүн төрөлхтний "Соёлын биет бус өв"-ийн жагсаалтад бүртгэгдлээ. Ингэснээр манай улсаас ЮНЕСКО-ын Соёлын биет бус өвд бүртгүүлсэн 15 дахь өв болж байгаа юм. 

Тал нутгийн нүүдэлчин Монголчуудын амьдралын хэв маягт зохицон гарч ирсэн энэ өв уламжлалыг дэлхий нийт хүлээн зөвшөөрч хадгалж авч үлдэх ёстой, хойч үедээ өвлүүлэн үлдээх ёстой, монгол хүнийг, Монгол Улсыг ондоошуулж байгаа энэ брендээ бид хадгалж үлдэх ёстой юм. Үүнийг дэлхий ийнхүү хүлээн зөвшөөрлөө.

Хөхүүрийн айраг нь биед сайн бөгөөд хөхүүрт хадгалсан айргийг жилийн дараа хэрэглэхэд хэвээрээ  байдаг.  Үүний нууц нь хөхүүрийн шир айраг хоёрын хооронд биологийн идэвхит бодис харилцан шимэгдэн боловсорч байдагтай холбоотой гэж үздэг байна.

Мөн гүүний айраг нь хүний хоол боловсруулах эрхтний олон төрлийн өвчин эмгэгийг анагааж, ходоод, нарийн гэдэсний ажиллагааг идэвхжүүлдэг, зөв иссэн айраг, цэгээг эмчилгээ сувилгаанд хэрэглэдэг бөгөөд айраг нь уушгины сүрьеэ өвчний хурц үеийн дараагаар өвчтөнд өдөрт 0.5-2 литрээр уулгахад 45-60 хоногийн  дотор биеийн жин нь нэмэгдэж, цусны биохимийн үзүүлэлт нь сайжирдаг байна.

Эх сурвалж: erennews.mn