Манай улсад шинэ короновирусын анхны тохиолдол илэрсэнтэй холбогдуулан Улсын онцгой комиссын хуралдаанаар бага насны хүүхэдтэй ээжүүдийг гэрээсээ ажиллах нөхцөл боломжоор хангах, цалинтай чөлөө олгох зэрэг арга хэмжээ авахыг өмчийн хэлбэр харгалзахгүй даалгасан. Дээрх шийдвэрийн хүрээнд 1900-1950 мэдээллийн лавлах дотооддоо зохицуулалт хийн иргэд үйлчлүүлэгчиддээ чирэгдэлгүй, тэдэнд үйлчлэх үйлчилгээний ажлыг тасалдуулахгүйгээр ажилтнуудаа гэрээсээ ажиллах боломжоор хангажээ. 

Ингэхдээ технологийн давуу талыг ашиглан ҮҮЛЭН системд /Cloud Computing/ суурилсан мэдээлэл лавлагааны үйлчилгээг үзүүлж байна. 19000-1950 мэдээллийн лавлах ЦАР ТАХЛЫН халдварт эрсдэлээс ажилчдаа хамгаалж, гэртээ тав тухтай орчинд хэрэглэгчиддээ бүх төрлийн мэдээлэл лавлагааг өгч ЦАЛИНТАЙ, АЖИЛТАЙ байх боломжийг давхар олгож байна.

-Гэрээсээ ажлаа хийх ямар байна вэ?
Миний хувьд бага насны хүүхэдтэй. Гэртээ хүүхдүүдтэйгээ хамтдаа ажиллах нь илүү сэтгэл амар байдаг юм байна. Хүүхдэдээ анхаарлаа хандуулна, хажуугаар нь гэрийнхээ ажлыг амжуулна, ажлаа давхар хийж байгаа болохоор олон давуу талтай юм. Ер нь гэртээ байгаа болохоор их тохитой сайхан байна.  
-Ихэвчлэн ямар төрлийн лавлагаа мэдээллийг асууж байна вэ?
Цаг үетэй холбоотой хүнс, худалдааны төвүүд болоод ажиллаж байгаа газруудын цагийн хуваарийн талаарх мэдээллийг түлхүү асуудаг. Мөн цар тахалтай холбоотой нөхцөл байдлын мэдээллийг асууж байна.
-Та бүхний хувьд лавлагаа мэдээлэл өгснийхөө дараа байнга зөвлөмж хэлдэг юм байна? Иргэдэд хандаж юу гэж хэлмээр байна вэ?
Бидний хувьд хэрэглэгчиддээ лавлагаа өгснийхөө араас гараа тогтмол угааж, маскаа зүүж хэвшихийг сануулдаг. Энэ нь ч үр дүнгээ өгдөг гэдэгт итгэдэг. Үүсээд буй нөхцөл байдалтай холбогдуулан биднийг гэрээсээ ажлуулж байгаа. Тиймээс иргэд та бүхэн ч гэсэн аль болох гэрээсээ гаралгүй хэрэгтэй лавлагаа мэдээллийг 1900-1950 мэдээллийн лавлахаас асуугаарай гэж хэлмээр байна.