Н.НОМТОЙБАЯРЫГ УИХ-ААС “ХӨӨХ ҮҮ”

УИХ-ын гишүүн Н.Номтойбаярын бүрэн эрхийг түдгэлзүүлэх хүсэлтийг Ерөнхий прокурор Б.Жаргалсайхан 14 хоногийн өмнө УИХ-д өргөн барьсан. Асуудлыг УИХ 48 цагийн дотор хэлэлцэн шийдвэрлэх ёстой байв. Гэвч УИХ-ын гишүүний халдашгүй байдлын дэд хорооны ирц найм хоногийн дараа бүрдэж, өнгөрсөн долоо хоногийн баасан гарагт хуралдсан юм. Улмаар Халдашгүй байдлын дэд хороо энэ асуудлаар хуралдаж, Н.Номтойбаярыг түдгэлзүүлэхийг дэмжсэн. Харин энэ долоо хоногт Хууль зүйн байнгын хороо болон Төрийн байгуулалтын байнгын хорооны хуралдаанаар дээр асуудлыг хэлэлцэж, гишүүдийн олонхийн саналаар Н.Номтойбаярын бүрэн эрхийг түдгэлзүүлэхийг дэмжээгүй юм. 

 Н.Номтойбаярыг бүрэн эрхийг түдгэлзүүлэх асуудалтай холбогдуулан Ерөнхий прокурор Б.Жаргалсайхан “Мөрдөн байцаалтын нууц задруулсан. Задалсан мэдээллийн талаар мөрдөн байцаах ажиллагаа явагдаж байгаа учраас дахин мэдээлэл задрахаас сэргийлэх үүднээс түдгэлзүүлэх асуудлыг ярьж байна.  Н.Номтойбаяр гишүүнийг гэм буруутай гэж хэн ч тодорхойлоогүй. Гэм буруутай эсэхийг ганцхан шүүх л тодорхойлдог. Өнөөдөр нотлох баримтын хүрээнд яллах, цагаатгах нотлох баримт л цуглаж байна шүү дээ” хэмээн мэдэгдсэн. Харин бүрэн эрхийг  түдгэлзүүлэхгүй тохиолдолд тодорхой задалсан нотлох баримтууд үгүйсгэгдэх. Зарим нэгэн шалгах ажиллагаанууд устаж үгүй болгох талтай гэдгийг Ерөнхий прокурор мэдэгдээд байгаа билээ. 

Тэгвэл өнөөдөр парламент Н.Номтойбаярыг авч үлдэх эсэхээ шийднэ. Өчигдөр намынхаа Хяналтын хорооны шийдвэрээр намаасаа хөөгдсөн Н.Номтойбаярыг өнөөдөр ангийн нөхөд нь УИХ-аас “хөөх” эсэхийг шийдэх нь. 

Эх сурвалж: olloo.mn