Ж.БАТ-ЭРДЭНЭ: ДЭМЖЛЭГ ҮЗҮҮЛЖ БАЙГАА ЖДҮХ САНГ БУСАДТАЙ СААРМАГЖУУЛААД ЯВЖ БОЛОХГҮЙ
Тусгай сангуудыг дагалдуулсан хуульд Жижиг дунд үйлдвэрлэлийг хөгжүүлэх сан, Тариалан эрхлэлтийг дэмжих сан, Мал хамгаалах санг нэгтгэж, үйлдвэрлэлийг дэмжих сан болгох талаар хэлэлцэж байгаатай холбогдуулан жижиг , дунд үйлдвэрлэл үйлчилгээ эрхлэгчдэд зориулагддаг ЖДҮ-ийн зээл олгогдох боломжгүй болох эрсдэл үүсээд байгаа юм.
Дээрх асуудалтай холбогдуулан ЭЗБХ-н дэргэдэх ЖДҮ-ийг хөгжүүлэх дэд хороон дарга Ж.Бат-Эрдэнээс байр суурийг нь тодруулсан юм.
Ж.Бат-Эрдэнэ: Засгийн газраас л нэгтгэе гэсэн санал гарч ирээд байгаа. ЖДҮХС 47 тэрбум төгрөгөө аятайхан зарцуулчихсан. Саяхан жижиг, дунд үйлдвэрлэл эрхлэгчидтэй уулзаж байхад хуваарилалт, сонгон шалгаруулалт маш аятайхан болсон. Зөв зүйтэй болсон гэж байсан. Өмнө нь 90-ээд тэрбум төгрөг зарцуулж байхад 200 гаруй ААН тус зээлийг авч байсан. Гэтэл сая 47 тэрбум төгрөгийг зарцуулахад 400 гаран аж ахуй нэгжүүд зээл авахаар шалгараад байна. Одоо л голдирол руугаа орж байтал бид өмнөх алдсан алдаанаас болж энийгээ давтаж, үгүйсгэж болохгүй.
Монгол улсад ЖДҮ-ийн ажиллах боломж, бололцоо маш их байгаа. Энэ жижиг зах зээлээ бид өөрсдөө хямгадаад ЖДҮ-ээ хөгжүүлээд, орлоготой болж, ядуурлаасаа гарах байтал ганц дэмжлэг үзүүлж байгаа сангаа бусадтай саармагжуулаад явж болохгүй. Энэ дээр эсрэг асуудал дэвшүүлээд явна гэж бодож байна. ЖДҮХС тусдаа байх ёстой. Харин ч бүр өргөжүүлэх ёстой. Жижиг, дунд үйлдвэрлэгчид үүнийг өргөжүүлье гэж байгаа. Одоо л голдиролдоо орлоо. Зөв зүйтэй боллоо. Одоо харин оролцогчдоо улам өргөжүүлээч ээ. Нутаг орондоо орон нутгийн хэмжээнд энийгээ өшөө өргөжүүлж өгөөч ээ. Үйлдвэрлэлээ дэмжиж өгөөч ээ гэсэн саналыг тавьж байна гэсэн юм.
Тусгай сангуудыг нэгтгэснээр Засгийн газрын тусгай сангийн тухай хуульд заасан "Жижиг, дунд үйлдвэрийг хөгжүүлэх санд жил бүр улсын төсвөөс хуваарилах хөрөнгийн хэмжээ нь тухайн жилийн улсын төсвийн хөрөнгө оруулалтын 10 хувиас доошгүй байна. Энэ хэсгийг 2030 оны 01 дүгээр сарын 01-ний өдөр хүртэл дагаж мөрдөнө" гэж заасан нь хэрэгжих боломжгүй болж байгаа хэрэг юм.
Шууд үзэх:
