Өчигдөр буюу 2021 оны хоёрдугаар сарын 04-ны өдөр ТВ9 телевиз дээр "Шинэ үеийн засгийн газраас иргэд юу хүсэж байна вэ?" нээлттэй хэлэлцүүлэг боллоо. Тус хэлэлцүүлэгт Баялаг бүтээгчдийг дэмжих холбоо"-ны Ерөнихийлөгч, Бизнесийн ухааны Доктор(Ph.D), Профессор Ч.Даваабаяр, эдийн засагч, дэд профессор, СЭЗДС-ын Санхүү удирдлагын зөвлөх Ж.Дэлгэрсайхан, Сентрополим ХХК-ын Гүйцэтгэх захирал, эдийн засагч Т.Энхбаяр, Төв аймгийн МАХН-ын дарга, Эрх зүйч О.Буяннэмэх нар оролцож цар тахлын үеийн өнөөгийн нөхцөл байдлын үед шинээр байгуулагдсан Засгийн газраас иргэд юу хүсэж байгаа талаар хэлэлцлээ.
Тус хэлэлцүүлэгт Ч.Даваабаяр: Монгол улс өндөржүүлсэн бэлэн байдал тогтоогоод 1 жилийн ойн дээрээ ирж байна. Ковидын анхны хөл хорионы үед гутал засвар, үсчин, жижиг зочид буудал гэх мэт 4828 жижиг худалдаа эрхлэгч нар үйл ажиллагаагаа зогсоож байсан. Энэ мэтээр жижиг, дунд үйлдвэрлэл эрхлэгч нар бүтэн 1 жил хүндхэн замыг туулж ирлээ, хэдэн зуун бичил бизнес эрхлэгч, аж ахуй нэгжүүд үүд хаалгаа барьж байна.
Засгийн газраас тусгай сангуудаар олгодог 3 хувийн зээл байдаг. Тэр 3 хувийн зээлийг яг энэ ковидын хүнд хэцүү үед жижиг, дунд үйлдвэр үйлчилгээ эрхлэгч нартаа олгомоор байна. ЖДҮ сан өөрөө 2020 онд ямарч мөнгө баталж өгөөгүй. 2021 онд ч мөн адил төсөв тодотгож өгөөгүй. Төсвийн тодотгол хийж яаралтай ЖДҮ санг мөнгөжүүлэхгүй бол Ковид дуусахаас өмнө бизнес эрхлэгч нар чинь маш их өр зээлтэй болчихоод байна. Хэзээ нэгэн цагт Ковид ард үлдэж л таараа. Тэр цагт энэ хүмүүс чинь Яаж амьдрах вэ?, Яаж орлого мөнгө олох вэ? Яаж ажилаа хийх вэ ? гэдэг чинь хамгийн том асуудал болчихоод байна. ЖДҮ санг мөнгөжүүлэх хэрэгтэй, төрөөс олгодог онцгой хөнгөлөлттэй 3 хувийн зээлээ олгох хэрэгтэй гэдгийг онцоллоо.
Баялаг бүтээгчдийг дэмжих холбоо 2015 онд байгуулагдсан бөгөөд 21 аймаг, 7 дүүрэгт салбартай, одоогоор 100 мянга гаруй гишүүнтэй үйл ажиллагаа явуулж байгаа. Мөн өнгөрөгч оны 12 сард буюу хатуу хөл хорионы үеийн бизнесийн нөхцөл байдлын үндэсний хэмжээний томоохон судалгааг 21 аймаг, 9 дүүргийн жижиг, дунд үйлдвэрлэл, бизнес эрхлэгч нарын дунд явуулж, тус судалгаанаас гарсан зөвлөмжийг Монгол улсын төрийн тэргүүн, холбогдох яамд тамгын газарт хүргүүлсэн. Гэвч засгийн газар солигдож ЖДҮ чид дорвитой шийдэлд хүрч чадаагүй. 2021 оны шинээр байгуулагдсан засгийн газарт зөвлөмж, судалгааг албан тоотоор дахин хүргүүлсэн юм.
