Нийслэлчүүдийг өглөө бүр шинэхэн өндөг, тахиагаар хангадаг "Нион шель" ХХК-ийг танилцуудж байна. Үйлдвэрлэлээ явуулж эхлээд багагүй хугацааг үдсэн ч гэсэн зах зээлд хэдийнээ танил болсон тус компанийнхан өдөрт 20 мянга гаруй "Наш" өндгөө хэрэглэгчдэд хүргэдэг. Үйлдвэрийн тоног төхөөрөмжийг Италийн “Tecno” компаниас нийлүүлдэг учраас европ стандартын анхны үйлдвэр болж байгаа гэж тус компанийн захирал Т.Далантай онцолсон. Түүгээр ч барахгүй дотооддоо үйлдвэрлэсэн бүтээгдэхүүнийг эрүүл, шинээр нь хэрэглэгчиддээ хүргэхийн тулд энэ салбарыг сонгосон гэж ярих даруухан хирнээ хөдөлмөрч эмэгтэйтэй бизнесийнх нь талаар ярилцлаа.
"Нион Шель" ХХК-ийн захирал Т.Далантай
-Сайн байна уу, Чухам яагаад энэ салбарыг сонгож бизнес хийх болсон талаар яриагаа эхлүүлбэл?
-Сайн байна уу. Ерөнхийдөө дотооддоо үйлдвэрлэсэн шинэ бүтээгдэхүүнийг хэрэглэгчиддээ хүргэхийн тулд энэ салбарыг сонгож эргэлт буцалтгүй ажиллаж эхэлсэн. Энэ хугацаанд үйлдвэрийнхээ хүчин чадал, хүний нөөц зэргийг ббрсдийн чадлаараа нэмэгдүүлсээр ирсэн. Энэ онд ч гэсэн үйлдвэрийнхээ хүчин чадлыг дахиж нэмэгдүүлэхээр ажиллаж байна.
-Аливаа зүйлийг шинээр эхлүүлэхэд мэдээж олон хүндрэл бэрхшээл тулгардаг шүү дээ?
-Тэгэлгүй яахав. Мэдээж хүндрэл бэрхшээл их тулгарсан. Хамгийн хэцүү нь анх энэ салбарыг сайн мэдэхгүй судалгааны журмаар л орсон болохоор чадахгүй зүйл олон байсан. Тухайн үед Шувуун фабрикийн энэ хавьд тахианы ферм байгуулах нь зөв юм шиг санагдаад тэгээд л сэтгэл шулуудсан даа. Тэгээд л туршлагатай хүмүүсээс асууж, өөрөө судалсаар байгаад фермээ өдий хүргэлээ.
-Цаашид ямар, ямар ажлуудыг хийхээр төлөвлөж байна?
-Манай компани 2009 оноос жил бүр үе шаттайгаар нөөц бололцоондоо тулгуурлан дэд бүтцээ хөгжүүлсээр ирсэн. 2014 онд Чингис бондоос дэмжлэг аваад тоног төхөөрөмжөө шинэчилсэнээр хамгийн сүүлийн үеийн дэвшилтэт технологиор чанартайгаар өндгөө боловсруулдаг болсон. Жилд долоон сая 480 мянган өндөг, 21 тонн тахианы мах үйлдвэрлэж худалдаанд гаргаж байна.
-Бусад ижил төрлийн үйлдвэрлэл эрхэлдэг байгууллагуудтай хамтран дотоодынхоо хэрэгцээг бүрэн хангах боломжтой гэж байсан. Энэ талаараа дэлгэрэнгүй яривал?
-Монголын компаниуд жил бүр хүчин чадлаа нэмэгдүүлж байгаа. Бидний хэтийн зорилго бол 2018 он гэхэд импортын өндөг, тахианы махыг болиулж өөрсдөө дотоодынхоо хэрэгцээг хангах төлөвлөгөөтэй ажиллаж байна.
Утас: 9907-8667, 9976-0550
