Баялаг бүтээгч нэвтрүүлгийн анхны дугаарын зочдын нэг, спорт хувцасны "Монлайн" брэндийн үүсгэн байгуулагч А.Чимэд-Очир Баялаг бүтээгчдийг дэмжих холбоонд зочилж, холбооны лого бүхий спорт хувцсыг нэвтрүүлгийн санаачлагч Ч.Даваабаярт дурсгалаа.
Тэрээр "Баялаг бүтээгч" төсөл 2015 онд эхэлж байх үеэс хамтран ажилласаар ирсэн бөгөөд төслийн 2 дахь шатны нэвтрүүлэгт оролцсоноор "Монлайн" брэндийн 21 аймагт дахь салбар нэгжүүдийг үйл ажиллагаа эрчимжиж, захиалга, борлуулалт нэмэгдсэн талаар нэвтрүүлгийн багийнхантай уулзах үеэрээ онцолж байлаа. 
А.Чимэд-Очир: Баялаг бүтээгчдийг дэмжих холбоо мэдээллийн сувгуудаар дамжуулан үйлдвэрлэгч, баялаг бүтээгчдийн үйл ажиллагааг сурталчлан, таниулах ажлыг хийж байгаад маш их баяртай байдаг. Бизнес эрхлэгчдийн хувьд маркетинг сурталчилгаа чухал зүйл. Маркетингийн үр дүн маргааш нь шууд мэдрэгддэггүй. Гэсэн хэдий ч урт хугацаандаа хэрэглэгчдийн зүрх сэтгэл, тархи оюунд "Монлайн" гэж спорт хувцасны брэнд байдаг гэдгийг таниулж, шингээж өгч байна. Ингэснээр өнөөдөр биш ч гэсэн сарын дараа, магадгүй жилийн дараа хэрэглэгчдэд спорт хувцасны хэрэгцээ шаардлага гарсан үед "танайхыг нэвтрүүлгээр үзсэн" гээд зориод ирэх хүмүүс болон байдаг. Энэ чинь нэвтрүүлэг маань хүмүүст хүрч, үр дүнгээ өгсний бодит илрэл юм. Цаг ямагт баялаг бүтээгч, үйлдвэрлэгчдээ дэмжсээр ирсэн Баялаг бүтээгчдийг дэмжих холбооны хамт олондоо баярлалаа.