Монгол Улсын Засгийн газраас Эрүүл мэндээ хамгаалж, эдийн засгаа сэргээх 10,0 их наяд төгрөгийн цогц төлөвлөгөөг баталсан. Энэхүү арга хэмжээний хүрээнд хоёр их наяд төгрөгийн ажлын байрыг хадгалах зээлийг арилжааны банк олгохтой холбогдуулан Жижиг, дунд үйлдвэрийн газарт ААН-үүдээс жижиг, дунд үйлдвэр, үйлчилгээ эрхлэгчийн тодорхойлолт авах хүсэлтүүд ихээр ирж байгааг тус газраас мэдээллээ.


"2 их наяд төгрөгийн хөнгөлөлттэй зээл олгох дээрх хөтөлбөрийн хүрээнд барьцаа хөрөнгө хүрэлцэхгүй, Зээлийн батлан даалтын сангаар дамжуулан барьцаа хангуулах үед жижиг, дунд үйлдвэр, үйлчилгээ эрхлэгчийн тодорхойлолтыг шаардана. Энэхүү үүссэн нөхцөл байдалтай уялдуулан аж ахуйн нэгжид чирэгдэл үүсгэхгүйн үүднээс тус газраас Жижиг, дунд үйлдвэр, үйлчилгээг дэмжих тухай хуулийн 4 дүгээр зүйлийн 4.1.1, 7 дугаар зүйлийн 7.1-д заасан шаардлагыг тус тус хангасан талаарх тодорхойлолтыг та бүхний банканд ирүүлсэн материалд үндэслэн Зээлийн батлан даалтын санд уламжлах юм. Энэхүү мэдээллийг бүх банкны бүх салбарт хүргүүлсэн болно" гэж Засгийн газрын хэрэгжүүлэгч агентлаг Жижиг, дунд үйлдвэрийн газраас өөрийн цахим хуудаснаа мэдэгдлээ.



Эх сурвалж : Жижиг, дунд үйлдвэрийн газар/SME Agency of Mongolia