Баянгол дүүргийн хэмжээнд энэ оныг Баялаг бүтээгч буюу үндэсний үйлдвэрлэлийг дэмжих жил болгон зарласан билээ. Тэгвэл өнөөдөр тус дүүрэг болон Баялаг бүтээгчдийг дэмжих холбооны / ББДХ/ удирдах зөвлөлийн гишүүд уулзан ирэх онд хийх ажлын төлөвлөгөөгөө ярилцахын сацуу хамтран ажиллах санамж бичгийг үзэглэлээ.
Баянгол дүүргийн Засаг дарга Д.Оросоо
-Баянгол дүүрэг энэ оныг үндэсний үйлдвэрлэгчдийг дэмжих жил болгон зарлалаа. Үүний хүрээнд онцгойлон ямар ажлуудыг хийхээр төлөвлөсөн бэ?
-Баянгол дүүрэгт нийтдээ 17000 гаруй аж ахуй нэгж байгууллага үйл ажиллагаа явуулдаг. Үүнээс жижиг дунд бизнес эрхэлдэг маш олон иргэд бий. Тиймээс Засгийн газар болон Аж үйлдвэрийн яамнаас гаргасан захирамжийн дагуу манай дүүрэг энэ жилийг Баялаг бүтээгчдийг дэмжих жил болгон зарлаад өнөөдөр ББДХ-тойгоо хийх ажлын төлөвлөгөөгөө ярилцан, хамтран ажиллах гэрээгээ байгууллаа. Тэгэхээр жижиг дунд үйлдвэрлэл, өрхийн үйлдвэрлэл, гарааны бизнес хийж эхэлж байгаа иргэдээ хамгийн их дэмжиж ажиллах дүүрэг байх болно. Бид Баянголд үйлдвэрлэв үзэсгэлэн худалдааг байнга зохион байгуулж ирсэн. Тэгэхээр энэ онд маркетинг, зар сурталчилгааны тал дээрээ түлхүү анхаарч борлуулалтыг нэмэгдүүлэх тал дээр ажиллана.
Баянгол дүүргийн ББДХ-ны Салбар хороон дарга Х.Алтанцацрал
-Баянгол дүүргийн салбар хороо энэ гэрээнд ямар байдлаар оролцож ажиллах вэ?
-2016 онд баялаг бүтээгчдийг дэмжих жил болгосноор жижиг дунд үйлдвэрлэл эрхлэгчдийг тодорхой түрээсийн хөнгөлөлттэй байранд байрлуулах, төрөл бүрийн хууль эрх зүйн мэдлэг олгох сургалтанд хамруулах, ажил мэргэжилгүй иргэдэд хөдөлмөрийн чиг баримжаа олгох, гадагшаа явж бизнес аялал болон үзэсгэлэн яармаг зохион байгуулах, төрөөс хэрэгждэг төсөл хөтөлбөрүүдэд иргэдээ хамруулах гэх мэтийн зүйл заалттай гэрээг өнөөдөр баталлаа. Тэгэхээр үүний хүрээнд баялаг бүтээгчдийнхээ бүтээгдэхүүнийг иргэдэд таниулж өргөнөөр хэрэглэдэг болтол нь нэг жилийн турш ажиллах болно.
