Ширэн бөмбөгийн шидтэнүүдийн эх орон Бразил улсад зохиогдож буй хөлбөмбөгийн дэлхийн аварга шалгаруулах 20 дахь удаагийн тэмцээнийг "Масс Агентлаг", ETV HD телевиз шууд дамжуулан үзүүлж байгаа билээ. "FIFA World Cup 2014"төслийн удирдагчдын нэг, "Масс Агентлаг"-ийн ерөнхий захирал Ч.Даваабаяртай ярилцлаа.

Дэлхийн аваргын 64 тоглолтын дийлэнхийг буюу 58-г нь шууд дамжуулан үзүүллээ. Өнгөрсөн хугацаанд хийж, амжуулсан ажлаа дүгнээд ярихгүй юу?

-Юуны өмнө манай "Масс Агентлаг", ETV HD телевизтэй бүтэн сарын турш хамт байсан үзэгч, спорт сонирхогчдодоо энэ өдрийн мэндийг хүргэе. Бид хоёр жилийн өмнө Польш, Украинд зохиогдсон Европын АШТ-ийг HD форматаар дамжуулж, үзэгчдэдээ дуу, дүрсний гайхамшгийг мэдрүүлсэн. Харин энэ удаа нэг шат ахиж Full HD формат, тоон технологиор ДАШТ-ийг үзүүлж байгаагаараа Монголдоо анхдагч болж чадлаа. Дээр нь бид өнөөдөр Монголдоо хамгийн шилдэг нь гэгдэж буй 11 тайлбарлагчийг нэг дор цуглуулснаараа мөн л анхдагч үзүүлэлтийг нэмсээр байна. Түүнчлэн анх удаа public эрхийг авч, оюуны өмчийн хамгаалалттайгаар ДАШТ-ийг олон нийтийн газруудад үзүүлж байна.

Анх удаа хөлбөмбөгийг телевиз, радио, интернэт, гар утсаар цогцоор нь үзүүлж, багаараа ажиллалаа. Багаар ажиллахын давуу тал нь юу вэ?

-Хамрах цар хүрээ, нэр хүндээрээ зөвхөн олимпийн наадамтай л дүйцэх хөлбөмбөгийн их баярыг дэлхийн 198 оронд шууд дамжуулан үзүүлж байгаагийн нэг нь манай улс. Гэхдээ олон улсад ETV , "Масс Агентлаг" гэхгүй, Монгол л гэж ярина шүү дээ. Тиймээс дэлхийн хэмжээний энэ том төслийг ард түмэндээ бүхий л төрөл, хэлбэрээр нь цогцоор үзүүлэхийг зорилго болгон ажиллаж, амжилттай хэрэгжиж байна. Үүний тулд өдөр шөнөгүй хөдөлмөрлөж, нийт ажлынхаа 80 хувийг нугалж, ард нь гарах дөхөөд байна. Энэ бол багаараа ажилласны, хамт олны маань л хүч хөдөлмөрийн үр дүн.    

-Төслийг гардан удирдагчийн хувьд энэ удаагийн ДАШТ-ий талаарх бодлоо хуваалцахгүй юу?

-Судлаачдын тооцоогоор дэлхийн хүн амын тал нь буюу 3.6 тэрбум хүн google, reddit, twitter, instagram, facebook, youtube-ээр байнга ДАШТ-ий талаар мэдээлэл солилцож байна. Мөн анх удаа“НАСА”-гийн сансар судлалын багийнхан хүн төрөлхтний их баяр цэнгэл хөлбөмбөгийн ДАШТ-ийг задгай сансарт шууд хүлээн авч үзсэн.

Сансрын багийнхан эх дэлхийгээс 230.000 милийн зайтай тойрон эргэлдэж байгаа шүү дээ. Тэгвэл Монголд анх удаа MASS.MN сайт интернэтээр шууд дамжуулж одоогийн байдлаар 2.444.000 хандалт авсан статистик үзүүлэлт гарчээ. Энэ нь  бөмбөрцгийн аль ч хэсэгт байгаа монголчууддаа мэргэжлийн монгол тайлбартай, дуу дүрсний өндөр чанартайгаар хүргэснийх биз ээ.  Европоос гаралтай хөлбөмбөгийг төдийлэн тоодоггүй америкчууд энэ удаагийн дэлхийн аваргад маш их ач холбогдол өгч, шөвгийн 16-д үлдэж, америк шүүгч анх удаа хасагдах шатны тоглолтыг шүүсэн гээд олон сонирхолтой үйл явдал, рекордоор дүүрэн тэмцээн болж байна. 

 АНУ-ын шүүгч  Марк Гейгер

За тэгээд, энэ жилийн ДАШТ-д хэсэгтээ тэргүүн байр эзэлсэн найман баг бүгдээрээ дунд шөвөгт шалгарсан, Олон улсын хөлбөмбөгийн холбоо "Goal Line" технологийг анх удаа ашиглаж байгаа, Мундиалийн түүхэнд дэлхийн аварга цолыг хүртэж байсан бүх багууд Бразилд ирсэн, үлдсэн найман тоглолтод 21-ээс дээш бөмбөг ороход бүх цагийн хамгийн олон гоолтой ДАШТ болно, Колумбын хаалгач Фарид Мондрагон 43 нас, гурван хоногтойдоо Японы эсрэг талбайд гарч, бүх цаг үеийн хамгийн ахмад оролцогч болсон гээд л олон сонирхолтой баримт дурдаж болно.

Дэвшилтэт технологи, ухаалаг хэрэглээг ашиглан  ДАШТ-ийг шууд дамжуулан үзүүлэхээс гадна FIFA-д танай бүх мэдээлэл очих ёстой. Танай мониторинг судалгааг ямар байгууллага хийж байгаа вэ. Судалгааны зарим нэг үзүүлэлтийг сонирхуулж болох уу?

-Бололгүй яахав. FIFA-гийн мониторинг, судалгааг дэлхийд хүлээн зөвшөөрөгдсөн “Кантар” хийдэг. Харин тус байгууллагатай хамтран ажилладаг “Максима консалтинг” Монгол дахь судалгааг хийж байна. Монголд ДАШТ-ний шууд дамжуулалтыг  нийт үзэгчдийн 60-аас дээш хувь нь ганцхан суваг сонгон үзэж байгааг хөндлөнгийн судалгааны байгууллага гаргажээ. Тэр нь ETV HD телевиз. Монголд өмнө байгаагүй рекорд тогтоосныг онцлоход таатай байна. Гэхдээ бид бусад хэвлэл мэдээллийн байгууллагадаа тойм хүргэх, ДАШТ-ий тухай мэдээллэх боломжийг олгосон.

Өндөр хариуцлагатай төсөл учир FIFA байнга анхаарал хандуулж, хэрхэн ажиллаж буйг бие төлөөлөгч нь ирж үздэг юм байна. ДАШТ эхлэхээс өмнө, эхлэсний дараа хоёр удаа ирж үзээд өндрөөр үнэлсэн. Бэлтгэл ажил, дамжуулалтын явц маш сайн байгааг онцлоод явсан нь бидэнд урам өгсөн. Энэ нь цаашдаа зөвхөн манай компани бус  монголчууд дэлхийн хэмжээний төсөлд хамтран ажиллахад боломжтой, найдвартай гэдгийг харуулж байгаа нь хамгийн чухал үнэлгээ юм.

Түүнээс гадна Монгол Улсын Ерөнхийлөгч Ц.Элбэгдорж бидний ажлыг үнэлэн ТАЛАРХАЛ  илгээсэнд бид баяртай байна. ДАШТ-ийг шууд дамжуулах ажилд манай сэтгүүлчдийн уйгагүй ажил хөдөлмөр маш чухал нөлөөтэй. Сэтгүүлчдийн маань спортод оруулсан хувь нэмрийг Сэтгүүлчдийн эвлэлийн дээд байгууллага, салбарын яам  өндрөөр үнэлж  баяр наадмын өмнө  шагнасанд бид бүхэн маш их  баяртай байна.

"Бразил 2014" хамгийн сонирхолтой үедээ ирлээ. Таны хувьд аль багийг дэмжиж байна вэ?

-Би Германы багийг дэмждэг. Үеийн үед түрүүлэх багуудын тэргүүн эгнээнд бичигдсээр ирсэн "Герман машин" үнэхээр мундаг байгаа нь Португалтай хийсэн эхний тоглолтоос харагдсан. Германчууд түүхэндээ анх удаа дөрөв дараалан хагас шигшээд шалгарсан багаар тэмдэглэгдлээ. Сая хэд хоног ажлын шугамаар Германд зорчихдоо тус тоглолтыг үзсэн юм. Берлин хотын зургаан газар аварга том LED дэлгэц засч, хүмүүс нэг дор цуглан шигшээ багийнхаа тоглолтыг үзэж, дэмждэг юм байна лээ.

-Бундестимийн довтлогч Мирослав Клозе дөрвөн ДАШТ-д оролцохдоо нийт 15 гоол оруулсан амжилтаар Бразилийн Роналдотой тэнцээд байна. Тэр энэ тэмцээнд бүх цаг үеийн мэргэн бууч болж чадах болов уу?

-Германы баг Францыг 1:0-ээр хожсоноор хагас шигшээд шалгарчихлаа. Шөвгийн дөрөвт үлдсэн тохиолдолд дахиад хоёр ч тоглолт хийх боломжтой. Энэ хоёр тоглолтын аль нэгт нь Клозе 16 дахь бөмбөгөө оруулж, бүх цаг үеийн шилдэг нь болно гэдэгт итгэж байна. Мөн Германы довтлогч Томас Мюллер хоёрхон ДАШТ-д тоглоод есөн гоол оруулчихлаа. Тэр энэ удаадаа биш гэхэд дараагийн тэмцээнд домогт Герд Мюллерийн 14 гоол оруулсан амжилтыг  эвдэх биз ээ.   

  Германы довтлогч Мирослав Клозе

  Бразилийн довтлогч Роналдо

Зохион байгуулагч Бразилийн шигшээгийн боломжийг хэрхэн үнэлж байна даа?

-Ард түмний тодорхой нэг хэсэг ДАШТ-ийг зохиохын эсрэг байж, хөлбөмбөгт зарцуулсан их мөнгөө нийгмийн сайн сайхны төлөө зориулах ёстой хэмээн жагсаал цуглаан хийснийг та бүхэн мэдэж байгаа байх. Гэхдээ зохион байгуулагчид шигшээ баг нь энэ тэмцээнд түрүүлбэл 200 сая хүнд сэтгэлийн их цэнгэл, таашаал өгнө, үүнийг ямар ч мөнгө төгрөгтэй харьцуулах аргагүй гэж хэлсэн байсан. Тийм болохоор бразилчуудыг олон сая хөгжөөн дэмжигчдийнхээ өмнө түрүүлчихээсэй гэж хүсч байна. Хэдийгээр Неймар тэргүүтэй бразилчууд тийм ч сайн тоглохгүй байгаа ч   нутгийн дэвжээ нь түшиж байх шиг санагдсан. Энэ удаагийн ДАШТ гоол ихтэй, рекорд эвдсэн, сонирхолтой үйл явдлаар дүүрэн болж байгаагаараа онцлог байна.

Том төслийг хэрэгжүүлэхэд хамтран ажилласан олон байгууллагын үүрэг их байсан байх?

-Дэлхийтэй хөл нийлэн алхах боломжийг монголчууддаа олгоход хамтран ажилласан бүх байгууллага, хамт олонд юуны өмнө талархал илэрхийлье. Ерөнхий ивээн тэтгэгчээр “Mobicom” корпораци ажиллаж байна. Мөн ХААН банк, “Жигүүр гранд” ХХК,  мэдээллийн лавлах 1900-1950 компани Gold ивээн тэтгэгчээр, манай үндэсний томоохон компани  “АПУ” ХХК, “Арвайн үндэс” ХХК, “Хүннү эйр” ХХК, MCS “Кока кола”, Adidas, “Нью жуулчин”, “Ноён пицца” ХХК bronze ивээн тэтгэгчээр, Үндэсний Дата Төв УТҮГ, ”Монгол өмгөөлөл”хууль зүйн фирм , “Матрикс” салон гэх мэт олон байгууллага хамтран ажиллаж байна.

-Хөлбөмбөгийн ДАШТ-ийг залгуулаад баяр наадам болно. Танай хамт олон наадмыг хэрхэн дамжуулах вэ?

-Дээр дурдсанчлан дэлхийн хүн амын талаас илүү нь  хөлбөмбөгөөр амьсгалж байна. Манайхан ч ялгаагүй хөлбөмбөгөө үзээд залгуулаад үндэсний их баяр наадамтайгаа золгох нь. Наадмаа үзчихээд ДАШТ-ий аваргын тоглолтыг үзнэ. "Масс Агентлаг"-ийн хамт олон Улсын  их баяр  наадмаа  дөрвөн газраас телемост хийн шууд дамжуулахад бэлэн болсон. Дэлхийн түүхийг бичилцсэн хэдхэн гүрэн байдгийн нэг нь Монгол Улс. Энэ түүхийг түүчээлж байгаадаа бид бүхэн баяртай байна. Тулгар төрийн  2223, Их Монгол Улсын 808,  Ардын хувьсгалын 93 жилийн ойн баярын мэндийг монголчууддаа хүргэе. Дэлгэсэн тэрлэг шиг нутагтаа дэнж хотолзтол сайхан наадаарай.