Үйлдвэрлэл эрхлэгчдийн хүсэлт, нийгмийн шаардлагаар үүсгэн байгуулагдсан “Баялаг бүтээгчдийг дэмжих холбоо” нь өдгөө 100 мянга гаруй идэвхтэй гишүүд дэмжигчидтэй мэргэжлийн холбоо юм.
Нийслэлийн 9 дүүрэг, 21 аймагт салбар хороогоо байгуулж, үндэсний хэмжээнд үйл ажиллагаа явуулж буй тус холбоонд салбар салбарын төлөөллүүд гишүүнээр элссээр байна. Тэгвэл энэ удаа үндэсний бүтээн байгуулагч “Алтан эрин говь групп” ХХК “Баялаг бүтээгчдийг дэмжих холбоо”-нд нэгдлээ. Гишүүний үнэмлэхийг "Баялаг бүтээгчдийг дэмжих холбоо"-ны гүйцэтгэх захирал Б.Батцэцэг, “Алтан эрин говь групп” ХХК-ийн ерөнхий захирал, Цонх шилэн фасад үйлдвэрлэлийн хөгжлийн төвийн удирдах зөвлөлийн дарга Г.Мөнх-Очирт гардуулан өглөө. Түүний хувьд “Баялаг бүтээгчдийг дэмжих холбоо”-ны үйл ажиллагаанд идэвхтэй оролцож баялаг бүтээгч, үндэсний үйлдвэрлэгчдийн дуу хоолойг шийдвэр гаргах түвшинд хүргэхэд хувь нэмрээ оруулахаа илэрхийлэв.
Тус компанийн хувьд хөдөө аж ахуй болон барилгын салбарын томоохон үндэсний үйлдвэрлэгч юм. Тодруулбал барилгын салбарт карказ угсралт, бетонон бүтээц, метал, шилэн фасад үйлдвэрлэл, угсралт болон эрчим хүчний хэмнэлттэй цонхны үйлдвэрлэл эрхэлдэг бол хөдөө аж ахуйн салбарт газар тариалан, мал аж ахуйн чиглэлээр үйл ажиллагаа явуулж байна.
