Монгол Улсын Ерөнхийлөгч Ухнаагийн Хүрэлсүх "Баялаг бүтээгчдийг дэмжих холбоо"-ны гишүүн, үндэсний үйлдвэрлэгч “Цалуут импекс” ХХК-ийн үйлдвэртэй танилцаж, санал хүсэлтийг нь сонслоо.

“Хүнсний хангамж, аюулгүй байдал” үндэсний хөдөлгөөний хүрээнд үндэсний үйлдвэрлэгчдийн бодит нөхцөл байдалтай шийдвэр гаргах эрх бүхий хүмүүсийн хамт танилцсанаар хөрсөн дээр буусан, үр дүнтэй ажил хийж чадна гэх итгэл төрж байгааг тус компанийн ажилчид хэллээ.

“Цалуут Импекс” ХХК нь үйлдвэрийн аргаар цэвэрлэж бэлтгэсэн 1000 гаруй төрлийн мах махан бүтээгдэхүүнийг эх орныхоо хэрэглэгчдэд төдийгүй Орос, Хятад, Араб болон Иран гэх мэт гаднын улсууд руу нийлүүлдэг.

Нийт 3.3га талбайг хамарсан мах нядлан боловсруулах үйлдвэртэй бөгөөд 15-20 тонн мах боловсруулж эцсийн бүтээгдэхүүн болгох хүчин чадалтайгаар 80 гаруй хүнийг ажлын байраар ханган ажиллаж байна.