“Баялаг бүтээгчдийг дэмжих холбоо”-ний Гүйцэтгэх захирал Б.Сэржмядаг “Жевел пөөрл консалтинг” ХХК-ийн захирал Х.Номинсувдыг хүлээн авч уулзан гишүүнээр элсүүллээ.

Х.Номинсувд нь нягтлан бодогч мэргэжилтэй бөгөөд зорилгодоо хөтлөгдөн бизнесийн салбар луу сэтгэл шулуудан орсон. Анх 2020 онд Багануур дүүрэгт пиццаны газрын франчайз эрхийг авч ажиллуулж эхэлсэн юм.  Тэрбээр багаасаа Багануур дүүргээ хөгжүүлэх мөрөөдөлтэй байсан учраас дүүрэгтээ пиццаны газар нээж, сайхан амттай хоолоор хүмүүст үйлчлэхийг хүссэн. Энэ хүслээ биелүүлэн амт чанар сайтай, хамгийн том, хамгийн хямд пиццаг хүмүүст хүргэж эхэлсэн гэлээ.

Үүнээс гадна БНСУ-аас “Жардин” кофе, цайг албан ёсоор оруулж ирдэг. Жардин кофе, цай нь цэвэр байгалийн жимстэй, хаана ч хэрэглэж болохоор савлагаатай, химийн будагч бодисгүй, амтлаг гэдгээрээ онцлог бүтээгдэхүүн юм.

Тансаг, чанартай, амтлаг зүйлд дуртай учраас үргэлж хамгийн сайхан пицца, кофе, цайг хүмүүст хүргэхийг эрхэмлэдэг аж.
Х.Номинсувдын хувьд түргэн хоол, бэйкери чиглэлд үйл ажиллагаагаа улам өргөжүүлэх сонирхолтой бөгөөд дүүргийн хэмжээнд үйлчлэх хүсэлтэй байгаа. Үүний тулд сайн технологич хэрэгтэй гэдгээ хэлсэн юм.
Мөн Багануур дүүргээ хөгжүүлж, хүүхэд залуустаа зориулсан цэцэрлэгт хүрээлэн, чөлөөт цагаа өнгөрүүлдэг төв зэрэг нийгэмд чиглэсэн хүмүүнлэгийн томоохон ажил хийж, бүтээх зорилготой гэлээ. Үүний дээр нийгэмд үнэ цэнийг бүтээдэг, түгээдэг баялаг бүтээгч болохыг ямагт эрмэлздэг гэв.