"Жижиг, дунд үйлдвэрлэлийг хөгжүүлэхэд хувь нэмрээ оруулж яваа баялаг бүтээгч, "Царамтай арвай" компанийн захирал Э.Жавхланбаярыг "Баялаг бүтээгчдийг дэмжих холбоо"-ны ерөнхийлөгч Ч.Даваабаяр хүлээн авч уулзлаа. 
Инноваци шингэсэн импортыг орлох бүтээгдэхүүн үйлдвэрлэгч "Царамтайн арвай" компани нь 2016 онд байгуулагдаж сав баглаа, боодол, шошго, гялгар уутыг 2018 оноос эхлэн монголдоо үйлдвэрлэж эхэлжээ. Тус компани нь сав баглаа боодлын өрсөлдөх чадварыг нэмэгдүүлэх, байгальд ээлтэй бүтээгдэхүүнийг үйлдвэрлэх, стандарт, өнгө, загвар, хийц, чанарыг өөрчлөх зорилгоор 2018 оноос сав баглаа боодлын хамгийн сүүлийн үеийн технологи, тоног төхөөрөмжийг нэвтрүүлжээ. Ингэснээр эрүүл мэндэд сөрөг нөлөөгүй, хүнсний аюулгүй байдлыг хангасан сав баглаа боодлыг үйлдвэрлэн зах зээлд нийлүүлж байна. Хамгийн сүүлийн үеийн дэвшилтэт технологи бүхий тус сав баглаа боодлын үйлдвэрийн тоног төхөөрөмж нь 80 хувийн хүний оролцоогүй ажилладаг байна. 
Царамтайн арвай компани нь анх ЖДҮ-ийг дэмжих төрөөс олгодог нэн хөнгөлөлттэй зээлд хамрагдаж үйлдвэрээ байгуулж байжээ. 
Уулзалтаар тус компанийн захирал Э.Жавхланбаяр үйлдвэрлэл үйлчилгээ явуулахад тулгамдаж буй асуудал, төр захиргааны байгууллагуудын хяналт шалгалт, зээл, зээлийн хүү зэрэг асуудлаар холбооны ерөнхийлөгч Ч.Даваабаяртай санал солилцлоо.