Монголын эдийн засгийн чуулганыг угтан энэ сарын 21-30-ны хооронд зургаан дэд сэдвээр хэлэлцүүлгүүд зохион байгуулахаар болсон. Тэгвэл өнөөдөр “Корпорейт конвейншн центр”-т “Монголын эдийн засгийн чуулган-2022”-ы Аж үйлдвэржилтийн сэргэлт урьдчилсан хэлэлцүүлэг зохион байгуулагдаж, “Баялаг бүтээгчдийг дэмжих холбоо”-ны ерөнхийлөгч Ч.Даваабаяр оролцож байна.
“Алсын хараа 2050” урт хугацааны хөгжлийн бодлогын эхний 10 жилд хөгжлийн хязгаарлагч хүчин зүйлсийг шийдвэрлэх эдийн засгийн зорилтот хөтөлбөр бол “Шинэ сэргэлтийн бодлого” юм. Тус бодлогын гол цөм нь аж үйлдвэржилтийн сэргэлт буюу баялаг бүтээгчдийг дэмжих юм. Тиймээс өнөөдрийн хэлэлцүүлэгт 21 аймаг 330 сумд салбар төлөөлөлтэй “Баялаг бүтээгчдийг дэмжих холбоо”-ны байр суурь чухал.
    Ер нь улс орнуудын хөгжлийн үндэс нь аж үйлдвэржилт гэдгийг дэлхийн түүх нотолдог. Тухайлбал Өмнөд Солонгос улс 1962 онд ДНБ нь 2.7 тэрбум ам.доллар, нэг хүнд ногдох ДНБ нь 100 доллар хүрэхгүй байсан бол импортыг орлох, экспортод чиглэх аж үйлдвэржилтийн таван жилийн төлөвлөгөөт бодлогыг амжилттай хэрэгжүүлж чадсанаар 1979 он гэхэд ДНБ нь 66.57 тэрбум ам.доллар, нэг хүнд ногдох ДНБ нь 1783 ам.доллар одоо Ази тивийн дөрөв дэх, дэлхийн 12 дахь том эдийн засаг, дэлхийн долоо дахь том экспортлогч болжээ. Манай улс нүүрс, нефть, газрын ховор элементээрээ дэлхийд дээгүүрт эрэмбэлэгддэг. Гэтэл байгалийн баялгийнхаа 90 гаруй хувийг боловсруулахгүй хямд үнээр гаргадаг, буцаад дотоод хэрэглээний 90 гаруй хувийг өндөр үнээр импортоор авч байгаа нь аж үйлдвэржилт огт байхгүйтэй адил эмгэнэл юм.
Энэ тухай “Баялаг бүтээгчдийг дэмжих холбоо” байгуулагдсан цагаасаа эхлэн дуу хоолойгоо хүргэсээр ирсэн. Харин өнөөдөр албан ёсны хэлэлцүүлэг зохион байгуулагдаж байгаа нь илүү олон хүнд ойлголт өгөх боломж гэж харж байна.