15 жилийн хугацаанд 1000 гаруй нэвтрүүлэг хийсэн “Танайд мод тарья” ТББ “Баялаг бүтээгчдийг дэмжих холбоо”-нд гишүүнээр элслээ.
2007 онд экологийн чиглэлээр ажилладаг мэргэжлийн байгууллагууд ногоон орчин, экологийн боловсролын талаар дуугардаг хэвлэл мэдээллийн хэрэгсэл цөөн байх үед эрхзүйч мэргэжилтэй Б.Батболд сэтгүүлч гэргий Д.Насанбаяртайгаа хамтран “Танайд мод тарья” нэвтрүүлгийнхээ анхны дугаарыг гаргаж өнөөдрийг хүртэл 1000-аад дугаар буюу давхардсан тоогоор 100 мянган минутын нэвтрүүлэг бэлтгэн олон нийтэд хүргэжээ. Дэлхийн дулаарал, Монгол орны цөлжилт, агаар, орчны бохирдлыг бууруулахад хамгийн энгийн бөгөөд үр дүнтэй арга бол мод тарих явдал гэж үзэж энэхүү буянтай үйлсэд иргэдийг татан оролцуулж экологийн боловсрол олоход нь дотны туслагч нь байх зорилготой “Байгаль экологи”-ийн чиглэлийн тогтмол явагддаг анхдагч нэвтрүүлэг “Танайд мод тарья” болсон юм.
Тэгвэл энэхүү ач холбогдол бүхий ТББ өнөөдөр 21 аймгийн 330 сумд салбар, төлөөлөлтэй “Баялаг бүтээгчдийг дэмжих холбоо”-нд гишүүн болж, цаашид хамтран ажиллахаар болсон юм. Мөн ШӨХТГ-ын дэргэд байгуулагдсан Мэргэжлийн нэгдсэн холбоодын зөвлөлд давхар элсжээ. Ингэснээр тэдний хичээл зүтгэл, дуу хоолой нийгэмд илүү тодрох боломтой гэж үзэж байна.