ШӨХТГ-ын дарга Б.Бат-эрдэнэ БОАЖЯ-ы сайд болсон нь Мэргэжлийн нэгдсэн холбоодын зөвлөлийн үйл ажиллагаа тасалдах эрсдэлтэй гэж иргэд үзэж байсан. Тэгвэл шинээр томилогдсон дарга Т.Гантулга энэхүү зөвлөлийн үйл ажиллагаанд идэвхтэй оролцож, заавал үр дүн гаргаж ажиллана гэдэгээ илэрхийллээ.

Засгийн газрын ээлжит хуралдаанаар ШӨХТГ-ын шинэ даргаар Т.Гантулгыг томилсон. Ингэснээр МНХЗ-ийн үйл ажиллагааг шинэ томилогдсон дарга чиглүүлж ажиллах юм. Тэрээр өнөөдөр зөвлөлийн үйл ажиллагаатай танилцаж, цаашид хамтран хийх зүйлээ төлөвлөлөө. Т.Гантулга даргын хувьд олон тооны үр дүнгүй ажил хэргээс илүү цөөхөн үр дүнтэй ажил хийхийг илүүд үзсэн юм.
Мэргэжлийн нэгдсэн холбоод нь иргэдийн төлөөлөл байдаг. Тиймээс эдгээр хүмүүсийн эрх ашгийг хамгаалах зорилгоор ШӨХТГ болон зөвлөл хамтран ажиллах юм. Энэ нь олон улсад хэдийнээ хэрэгжиж, үр дүнгээ өгсөн арга бөгөөд Монгол Улсад анх удаа төрийн байгууллага мэргэжлийн холбоотойгоо хамтарч ажиллаж байгаагаараа онцлог.