Хэвлэл мэдээллийн хэрэгсэлд өгөх мэдээ XXI зууны эхнээс улс орнууд мэдлэгийн өрсөлдөөнд хүчтэй орж, мэдлэг бүтээх, үйлдвэрлэх, мэдлэгийг түгээх найдвартай шалгарсан байгууллагыг бий болгосон нь судалгааны их сургууль юм. Судалгааны их сургууль нь дэлхийн хурдацтай өөрчлөгдөх глобал зах зээл дээр улс орны өрсөлдөх чадварыг тодорхойлогчид юм.

Монгол Улс анх удаа “Судалгааны их сургуулийн эрх зүйн байдлын тухай хууль”-ийг УИХ-аар тун удахгүй хэлэлцэхээр болсон. Энэ хуулийг дэмжих зорилгоор Монгол Улсын Эрдмийн Их сургууль нь гадаад, дотоодын төр захиргааны болон эрдэм шинжилгээний байгууллагуудтай хамтран эрдэм шинжилгээний хурал, хэлэлцүүлэг, симпозиумыг цуврал болгон зохион байгуулж байна.

Тухайлбал, БНЭУ-аас Монгол улсад суух Онц бөгөөд Бүрэн Эрхт элчин сайд М. П. Сингх 2021 онд тус сургуульд зочлон эрдэмтэн, профессоруудтай уулзан БНЭУ-ын судалгааны их сургуулийн чиг, хандлагын талаар хэлэлцүүлэг өрнүүлсэн бол 2022 оны 01 дугаар сарын 18-нд Япон Улсаас Монгол улсад суугаа Онц бөгөөд Бүрэн Эрхт Элчин сайд Кобаяши Хироюки тус сургуульд зочлон эрдэмтэн, профессорууд, судлаач оюутнуудын төлөөлөлтэй уулзан илтгэл тавилаа.

Япон улсаас Монгол улсад суугаа бүрэн эрхт элчин сайд илтгэлдээ Япон, Монголын дээд боловсролын салбарт ялангуяа мэдээллийн технологийн салбарт хамтран ажиллах ихээхэн боломж байгааг онцлон тэмдэглэв.