Хамгийн залуу сийлбэрчин гэдгээрээ онцлог Х.Энхжин охин найзуудтайгаа нийлж сайн үйлсийн аян хийж байна. Тодруулбал модоор сийлбэр хийж олсон мөнгөөрөө эмнэлэг, цэцэрлэг гэх мэт газруудыг тохижуулдаг гэлээ.
Түүний бодлоор улсын төсөвтэй газрууд хөрөнгө мөнгө дутмаг байдаг учраас тух муутай харагддаг. Тиймээс багахан ч болов тус болохоор найзуудтайгаа нийлэн 2020 оноос эхлэн сайн үйлс хийх болжээ. Тэд бүгд хийж буй ажилдаа дуртай байдаг бөгөөд цагийг үр бүтээлтэй өнгөрүүлж байгаадаа сэтгэл хангалуун явцгаадаг. Мөн шинэ ажил хийх бүрт нь хөгжилтэй, сэтгэл хөдөлгөм зүйлүүд тохиолддог байна.



Цаашид өөрсдийн хийж буй сайн үйлсийн аянаа улам өргөжүүлэх хүсэлтэй байгаагаа хэлсэн юм. Нас, хүйс харгалзахгүйгээр нэгдэхийг хүссэн хүн бүрт тэдний үйл ажиллагаа нээлттэй. Одоогоор найман хүүхэд энэхүү сайн үйлсийн аяныг хийж байна.
Сүүлийн үед будаг болон модны үнэ нэмэгдэж, олдоц муутай болж байгаа нь тэдэнд хүндрэл үүсгэж байна. Гэхдээ зарим үед томчуудын зүгээс будаг авч өгөх үе гардаг. Энэ үед маш их баярладаг гэлээ.