"Цар тахал ба Эдийн засаг" сэдвийн дор Жижиг дунд үйлдвэр, үйлчилгээ эрхлэгчдийн нэгдсэн форум Төрийн ордонд болж байна. 

Энэ үеэр МУ-ын Ерөнхийлөгч У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нар форумыг зохион байгуулагчид, баялаг бүтээгч, ЖДҮ эрхлэгчдэд хандан "ИЛГЭЭЛТ" илгээжээ.

МУ-ын Ерөнхийлөгчийн "Илгээлт"-ийг Баялаг бүтээгчдийг дэмжих холбооны Ерөнхийлөгч Ч.Даваабаярт гардуулан өглөө. 

Ерөнхийлөгч У.Хүрэлсүхийн илгээлтэд "Эдийн засгаа сэргээж, засаж сайжруулах мөн жижиг дунд үйлдвэрлэгчдийг дэмжихийн зэрэгцээ хөдөлмөр эрхлэлтийг дэмжиж, дотоодын худалдан авалтыг нэмэгдүүлэх бодит шаардлага тулгарч байна. Мөн бизнесийн орчныг сайжруулж, шат шатны хүнд суртлыг арилгах шаардлагатай. Түүнчлэн баялаг бүтээгч, ЖДҮ эрхлэгчдэд олгодог санхүүгийн тогтолцоог эрс сайжруулж, хямд, хүртээмжтэй байлгах зэрэг санхүүгийн эх үүсвэрийг тодорхой болгох хэрэгтэй байна. Өнөөдрийн форумаас гарсан санал , зөвлөмжийг Монголын төр онцгой анхаарч , баялаг бүтээгчдээ дэмжих болно" гэжээ.