“Монгол БЭЛЭГ бэлэглэе” уриалга гаргажээ

Монгол зон олны Үндэсний их баяр “Цагаан сар”-ын баяр удахгүй тохиох гэж байна.

Уг баяраар Монгол хүн бүр үндэсний бахархлаа сэргээн, Монгол ёс заншлаа дээдлэн, өвгөд буурлууд, ахан дүүсээ хүндэтгэн нэг нэгнийхээрээ зочлон золгож, идээ будаагаа бэлдэн ирсэн зочдод гарын бэлэг өгөн үддэг.

Үндэсний статистикийн хорооноос гаргасан судалгаагаар Цагаан сарын баярын бэлэгний 80 орчим хувийг импортоор авч байгаа нь жил бүр дунджаар 357.3 тэрбум төгрөгийн гадагш урсгалыг бий болгож байгаа гэсэн маш өндөр дүн гарчээ.

Энэ жилийн сар шинийн баяраар улсын хэмжээнд 845 тэрбум төгрөгийн зардал гарахаар төлөвтэй байгаа тухай ХХААХҮЯ-наас мэдээлсэн. 

Түүнчлэн Тэтгэврийн зээлийг тэглэх тухай хууль батлагдсантай холбоотой Сар шинийн худалдан авалт өнгөрсөн жилтэй харьцуулахад нэмэгдэх төлөвтэй байгаа аж.

Иймд Нийслэлийн Засаг даргын тамгын газар, Нийслэлийн Шинжлэх ухаан, үйлдвэрлэл, инновацын газраас санаачлан Хүнс хөдөө аж ахуй, хөнгөн үйлдвэрийн яамтай хамтарсан  “Эх оронч хэрэглээ-2020” төслийн хүрээнд “Монгол БЭЛЭГ бэлэглэе” уриалга гаргажээ.

Ирж буй жил бол төмөр хулгана хэмээх жил. Монголчууд бид хулгана хөеөгөө хураадаг учраас тэр жилдээ олз омог ихтэй, тэдгээрээ хурааж хадгалах сайхан жил хэмээн ерөөдөг.

Гадагш урсаж байгаа тэр их хөрөнгийг эх орондоо үлдээх нь иргэн танаас шууд хамааралтай. Эх орондоо хайртай иргэн таны бас нэгэн үүрэг бол энэ орныхоо үйлдвэрлэлээ дэмжих явдал юм.

Үндэсний үйлдвэрлэгчдээ дэмжиж, сар шинийн баяраар “Монгол СОЁЛ бэлэглэе-Монгол ГОЁЛ бэлэглэе-Монгол ЭРДЭМ бэлэглэе” Монгол бэлгээ ахан дүүсдээ бэлэглэж, сар шинэдээ сайхан шинэлээрэй.

Эх сурвалж: ikon.mn