"Баялаг бүтээгчдийг дэмжих холбоо" ТББ ЖДҮ-ийг төрөөс ямар бодлогоор хэрхэн дэмжих тухай саналаа 2020 сонгуульд оролцох улс төрийн намуудад хүргүүлж байгаа. Тус холбоо өнөөдөр МАХН-ын удирдлагуудад 8 бүлэг 36 заалт бүхий саналаа албан ёсоор  гардуулж өглөө.

Энэхүү санал нь ЖДҮ хөгжиж байгаа орнуудын туршлагыг судалж, боловсруулсан учир үндэсний үйлдвэрлэгчдийн үйл ажиллагааг бодитоор дэмжиж,  хэрэгжүүлэх бүрэн боломжтой талаар Баялаг бүтээгчдийг дэмжих холбооны ерөнхийлөгч Ч.Даваабаяр онцоллоо. Мөн ЖДҮХС-ийн эргэлтийн хөрөнгийг нэмэгдүүлж, дэмжлэгийг бодитой болгох, эрх зүйн орчныг сайжруулах болон онцгой хөнгөлөлттэй зээл олгох, боловсон хүчний нийгмийн даатгал болон цалин хөлсийг төрөөс тодорхой хэмжээгээр хөнгөлөх зэргээр олон ажил хэрэгч саналуудыг тусгажээ. 

Тэгвэл МАХН-ын удирдлагууд Баялаг бүтээгчдийг дэмжих холбооноос хүргүүлсэн энэхүү саналыг хүлээн авч, 2020 оны УИХ-ын ээлжит сонгуулийнхаа мөрийн хөтөлбөрт тусгаж, бодит ажил болгохоо илэрхийлсэн юм.

Баялаг бүтээгчдийг дэмжих холбоо дээрх саналууд дээр нэмэлтээр сүүлийн гурван жилд зохион байгуулсан Жижиг дунд үйлдвэрлэл, үйлчилгээ эрхлэгчдийн нэгдсэн форум"-аас гарсан баялаг бүтээгчдийн санал зөвлөмжүүдийг тусгасан бөгөөд хамгийн гол нь Төрөөс жижиг дунд үйлдвэрлэл, үйлчилгээ эрхлэгчдийг дэмжих нэгдсэн бодлого шаардлагатай тул улстөрийн намууд мөрийн хөтөлбөртөө тусгаснаар үндэсний үйлдвэрлэгчдийн өнөөгийн байдал, тэдэнд тулгамдаж байгаа олон асуудлыг шийдэхэд түлхэц болно гэдгийг онцоллоо.

Нийгмийн шаардлага, баялаг бүтээгчдийн хүсэлтээр байгуулагдсан тус холбоо нь жижиг, дунд үйлдвэрлэл, үйлчилгээ эрхлэгчдийн талаар гаргах УИХ, засгийн газрын бодлого шийдвэр, хууль тогтоомжийг сайжруулахад ийнхүү саналаа өгч байгаа бөгөөд үндэсний үйлдвэрлэгчдийг дэмжсэн төрийн цогц бодлоготой болтол баялаг бүтээгчдийн дуу хоолой болж ажиллахаа илэрхийллээ. Мөн баялаг бүтээгчдийг хариуцсан, үндэсний үйлдвэрлэгчдийг дэмжсэн яам, агентлагтай болох нь юу юунаас чухал учир энэхүү саналыг ч мөн мөрийн хөтөлбөртөө тусгахыг хүслээ.

Саналыг бүрэн эхээр нь хүргэж байна