Олон улсын бизнесс эрхлэгч эмэгтэйчүүдийн сорилт (The International Women’s Entrepreneurial Challenge IWEC) байгууллага нь АНУ- ын Нью-Йорк хотод төвтэй бөгөөд дэлхийн бизнес эрхлэгч эмэгтэйчүүдийг олон улсын зах зээлд ажиллах боломжийг нэмэгдүүлэхэд туслах, боловсрол олгох, зөвлөлгөө, мэдлэг мэдээлэлээр хангах үндсэн зорилготой ашгийн бус олон улсын байгууллага юм. АНУ-ын засгийн газар IWEC-ээс явуулж буй хөгжиж буй орнуудын эмэгтэй бизнес эрхлэгчдийн амжилтыг дэмжих, эдийн засаг дахь эмэгтэйчүүдийн оролцоог нэмэгдүүлэх, дэлхийн эдийн засгийн өсөлтийг хурдасгах, хүйсийн тэгш бус байдлыг багасгах зорилготой олон төсөл хөтөлбөрүүдийг дэмжин ажилладаг. IWEC нь эмэгтэйчүүдийн ажлын байрыг олноор бий болгож буй бизнес эрхлэгч эмэгтэйчүүдийн олон улсын чуулга уулзалтыг жил бүр уламжлал болгон зохион байгуулдаг бөгөөд энэхүү хурал нь 2007 оноос хойш одоогоор Барселона, Нью-Йорк, Нью-Дели, Кэйп таун, Лима, Стокхольм, Стамбул, Брюссель, Сиэтл хотуудад болоод байна.

Энэ хурал нь эмэгтэй бизнес эрхлэгчид хоорондоо уулзан мэдлэг, туршлага солилцох, холбоо тогтоох, шинэ боломжуудыг нээх, хамтарсан үйлдвэр байгуулах, дэлхийн зах зээлд гарах олон боломжуудыг олгодогоороо ихээхэн ач холбогдолтой юм. Мөн энэ хурлаараа амжилттай бизнес эрхлэгч эмэгтэйчүүдийг тодруулж “The International Woman Entrepreneurial Challenge” шагнал гардуулж тэдний мэдлэг туршлагаас хуваалцдаг бөгөөд одоогоор энэ шагналыг дэлхий шилдэг бизнес эрхлэгч 291 эмэгтэй хүртээд байгаа юм байна. Энэ жил Монгол улсаас дээрх шагналыг зах зээлд УРБАН брэндийг үүсгэн байгуулагч “Денимон” ХХК-ий Ерөнхий захирал Д.Тунгалаг хүртжээ. Энэ удаагийн хурал БНХАУ-ын Шанхай хотод болсон байна.

Эх сурвалж: WWW.NEWS.MN