БНСУ-ын Санхүү, валютын хороо өнөөдөр ээлжит бус хурал зарлан хуралдаж шинэ төрлийн коронавирусын халдвар болох covid19-өөс үүдэлтэй дэлхийн цар тахлын нөлөөгөөр эдийн засагт үүсэж буй хүндрэлийг бууруулах зорилгоор төв банкны бодлогын хүүг түүхэндээ хамгийн бага буюу өнгөрсөн 2 сард баталсан 1,25%-аас дахин 0,5% бууруулж 0,75% болгов.

Энэ нь өчигдөр АНУ-ын Холбооны нөөцийн газар хуралдаж бодлогын хүүгээ 0,00-0,25% хүртэл бууруулсан санаанд оромгүй шийдвэртэй уялдаатайгаар хийж буй арга хэмжээ юм.

БНСУ-ын Төв банкны бодлогын хүү 0 хүртэл хувь руу ийнхүү буурч буй нь түүхэндээ анх удаа бөгөөд мөн Санхүү, валютын хороо өмнө нь ээлжит бус хурал зарлаж шийдвэр гаргаж байсан нь 2001 оны 9 сарын 11-ны террорист халдлага, 2008 оны 10 сарын дэлхийн эдийн засгийн хямралын үе гэсэн хоёр л тохиолдол байсан ба энэ удаагийнхтай 3 дахь удаагаа ийнхүү шийдвэрээ гаргаж байна.

Санхүү, валютын хороо нь Төв банкны бодлогын хүүг бууруулахаас гадна Санхүүгийн зуучлалын тусламжийн зээлийн (Төв банкнаас жижиг дунд үйлдвэрлэгч нарыг дэмжих зорилгоор арилжааны банкнуудад өгч буй дэмжлэг) хүүг одоо байгаа 0,50%~0,75%-аас 0,25% болгон багасгаж хөрвөх чадварын нийлүүлэлтийн нэмэлт арга хэмжээг авав.

Мөн цаашид банк, санхүүгийн байгууллагын санхүүгийн хүндрэлээс урьдчилан сэргийлж Дахин худалдан авах нөхцөлт(RP) үнэт цаасанд банкны бондыг нэмж оруулав.

АНУ-ын Холбооны Нөөцийн Газар өчигдөр "Big cut" зарласны дараа Шинэ Зеландын төв банк бодлогын хүүгээ 1%-аас 0,25% хүртэл бууруулж, үүнийгээ ирэх жил хүртэл барихаа зарласан юм.

Мөн Японы төв банк (BOJ) яаралтай хуралдаж ETF-ийн жилийн худалдан авалтын хэмжээг 6 триллион иенээс 12 триллион иен болгон хоёр дахин нэмэгдүүлнэ гэж мэдэгдсэн байна.

Ц.Өнөрзаяа
Күүкмин Их Сургуулийн багш
БНСУ, Сөүл хот